6 ميزات للسفر لوحدك

30/01/2015

healthy-woman

السفر من الأشياء الممتعة لمعظم الأشخاص، فالسفر بيغير من الشخصية و بيحسن مزاج الإنسان و بتشوفي تقاليد و عادات مختلفة و شخصيات مختلفة بتفكير مختلف، بتشوفي أماكن جديدة عليكي، بتكتشفي حاجات كتير ممكن جدا تكوني مكنتيش عرفاها.

السفر ميزاته أكتر من عيوبه، و طبعا في ميزة كمان و هي، هتسافري مع مين؟ مع أهلك ولا أصحابك و لا لوحدك؟ و ناس كتير متعودين على أول 2 و عارفنهم.

بس السفر لوحدك ده ممكن يبقى فكرة غريبة أو مش محببة بالنسبة لناس كتير مع إن ميزاتها أكتر من مميزات السفر مع الأهل و الأصحاب.

1-  مش بتبقي مقيدة بمواعيد معينة سواء في معاد السفر أو في الخروجات نفسها، بتنزلي و تسافري في الوقت اللي إنتي عايزاه بس أما بتبقي مع أهلك أو أصحابك، الموضوع بيختلف.

2- ميزة كمان في المتعة اللي في السفر لوحدك، إنك تقدري تسافري في أي مكان إنتي عايزاه و متروحيش مكان معين بسبب أصحابك.

3-  في ميزة برضه هي إن المفروض إنك هتقدري تتحكمي في الفلوس اللي معاكي بشكل كبير بعكس أما بتبقي مع أصحابك بتصرفوا فلوس كتير أوي على حاجات ممكن ميبقاش ليها لازمة بس و إنتي لوحدك بيبقى في تحكم شوية في الموضوع (المفروض يعني)

4- بتعملي اللي إنتي عايزاه، عايزة تنزلي في أي وقت هتنزلي، عايزة تتمشي اليوم كله هتعملي كده، عايزة تفضلي تشتري في حاجات هتعملي كده، و كل يوم بتبقي محددة هتعملي إيه من غير ما أي حد يعترض أو يقولك حاجة.

5-  هتتعرفي على ناس جديدة و تعرفي شخصيات و طريقة فكر مختلفة و دي حاجة كويسة و هتفيدك كمان و ده مش بيحصل بشكل كبير و إنتي مع أصحابك عشان بتبقوا أصحاب مع بعض في كل الأوقات و الفرصة دي مبتبقاش بشكل كبير زي أما بتبقي لوحدك.

6- الميزة الأخيرة و ممكن تكون أهم واحدة فيهم، هو إن السفر لوحدك هيخليكي تكتشفي حاجات فيكي، التجربة نفسها بإنك مسافرة لوحدك هتغير كتير من شخصيتك و نظرتك للناس و أسلوب حياتك كله في التعامل.

Facebook IconTwitter IconVisit Our InstagramVisit Our Instagram