6 طرق ازاي تفردي الهدوم من غير مكوى !

03/11/2016

Woman hand ironing a shirt, on cloth background

ساعات كتير مننا بيتحط في موقف اننا بنبقى مستعجلين عايزين نكوي الهدوم بتاعتنا ونفردها بس مافيش مكوى, مثلا تكوني في رحلة او في مكان مش متوفر فيه مكوى وهدومك مكرمشة ومحتاجة انك تفرديها في الحالة دي هتعملي ايه ؟ احنا النهاردة جينالكم الحل في 9 طرق تقدري تفردي بيهم هدومك من غير مكوى.

طرق فرد الهدوم من غير مكوى:

1- مكوة الشعر:

مكوة الشعر من الحلول السريعة اللي ممكن تفردي بيها الهدوم وخصوصا المناطق الصغيرة اللي بيكون صعب الوصول ليها زي اللياقات والاساور وبين الزراير, سخني مكوة الشعر على الدرجة المتوسطة وحطيها على المكان اللي عايزة تفرديه لمدة ثواني بس طبعا نتأكد ان المكوة نضيفة ومفيهاش اي منتجات خاصة بالشعر عشان منبوظش الهدوم, بس الافضل منستخدمش المكوى مع الهدوم الحساسة اللي ممكن تتحرق بسرعة زي الساتان او الحرير.

1

2- المية والخل:

خليط المية والخل من الطرق الفعالة لفرد الهدوم, اخلطي خل ابيض مع مية بنسبة 3:1 يعني المية تكون اكتر من نسبة الخل 3 مرات, ونحط الخليط في ازازة ببخاخ ونرجها كويس وكده يبقى جاهز عندنا رذاذ ضد التجاعيد رشيه على الهدوم والاماكن اللي فيها تجاعيد عشان تفرديها.

2

3- السيشوار:

ممكن نستخدم السيشوار لفرد الهدوم, شغليه على اعلى درجة ووجهي الهوا السخن ناحية الهدوم وركزيه على الاماكن المكرمشة هتساعد على فردها.

3

4- بخار الحمام:

افتحي المية السخنة وعلقي الهدوم جنب الدش بس بعيد عن المية عشان متتبلش لكن يكون في اقرب مكان للبخار اللي طالع من المية واقفلي شباك الحمام والباب وسيبيها شوية في البخار, هتلاقي الكرمشة اللي في الهدوم اتفردت.

4

5- فوطة مبلولة:

حطي الهدوم على ترابيزة او اي سطح مستوي وافرديها كويس وهاتي فوطة مبلولة حطيها على الهدوم واضغطي عليها بايدك بقوة وبعد كده شيليها وسيبي الهدوم تنشف, او ممكن تفرديها وتحطيها تحت اي حاجة تقيلة يعني مثلا تحت مرتبة السرير.

5

6- حلة سخنة:

هاتي اي حلة عندك حطي فيها مية وسيبيها تغلي وبعدين فضيها من المية, افردي الهدوم على سطح مستوي واضغطي على الهدوم بالحلة هتكون سخنة فهتساعد ان الهدوم تتفرد يعني هتقوم تقريبا بمهمة المكوى بالظبط.

6

Facebook IconTwitter IconVisit Our InstagramVisit Our Instagram