5 فوائد للشاور البارد لصحتك و جمالك

26/02/2017

 5 فوايد لصحتك و جمالك من الشور البارد مكونتيش تعرفيهم قبل كده

لو أنتى من البنات اللى بتحب تاخد كل يوم الصبح شور سخن ينشطها و يفوقها من أى كسل أو تعب و يحسسك بالانتعاش وأنك جاهزة تبدأى يومك، يبقى تعالي اقري معانا الموضوع ده اللى هيخليكى تغيري رأيك خالص و تجربي الشور البارد.. ده عشان الشور البارد له فوايد و مزايا أكتر لجسمك و صحتك مش هتخليكى تستغنى عنه كل يوم الصبح لو بتقدرى5 فوائد لصحتك و جمالك من الشور البارد مكونتيش تعرفيهم قبل كده.

1- الشور البارد بيحارب البرد و الأنفلونزا:

فى دراسة عملوها علماء المناعة فى التشيك بتقول أنه الرجاله اللى بياخدوا شور بارد درجة حرارة المية فيه 14 درجة تلات مرات فى الاسبوع فى خلال 6 أسابيع بيلاحظوا إن عدد كرات الدم البيضاء أندفع عندهم بشكل كبير و ملحوظ. لأنه خلال الاستحمام المية الباردة جسمك بيحاول يدفى نفسه فبيبدأ يشتغل الجهاز المناعى وبالتالى عدد كرات الدم البيضاء بتزيد فمن خلالها بيقدر جسمك يحارب أي عدوى و خصوصا البرد والأنفلونزا و كمان بتحارب الفيروسات و السموم فبتبدأى تحسي أنك منتعشة و نشيطة بسبب تدعيم جهازك المناعى، فلو حاسه أنك داخلة على دور برد أحسن حاجه تعمليها أنك تدخلى تاخدى شور بارد، او أنك تحاولى تاخدى شور بارد من وقت للتانى خلال الأسبوع .

2-  تنشيط الدورة الدموية :

جسمك كله بيبقى مشدود تحت المية الساقعه وده مفيد ليكي لأنه لما جسمك بيحس المية الساقعه نازلة عليه الشرايين بتنكمش تحت الجلد، والانكماش ده بيجبر الدم أنه يعدي فى شرايين أضيق نوعا ما وعلشان جسمك يقدر يحافظ على الأعضاء المهمة دافية  فبيزود من اندفاع الدورة الدموية للجسم وده هيخلى جسمك و بشرتك صحيين أكتر. حاولي أنك تنوعي الشور بتاعك بين سخن  وبارد من وقت للتانى.

 وممكن كمان تحسنى من الدروة الدموية لجسمك أنك بعد حمامك السخن تنزلى تحت المية الباردة و تفضلى وقت قليل زى دقيقة مثلا، ده تكنيك بيبقي موجود في ال spa اسمه plunge pool وبيبقي pool صغير فيه مايه ساقعة قوي وبينصحوا بالنزول فيه بعد الخروج من السونه أو الستيم.

3- الشور البارد هيساعدك تخسى :

تغيير درجة حرارة الشور الصباحى بتاعك ممكن يساعدك انك تخسي و يبقى الدايت بتاعك فعال أكتر، الأبحاث بتقول أنه المية الباردة هتخليكى ترتعشى من حوالى 10لـ 15 دقيقة ده بيساوى أنك تعملى تمارين اليوم بتاعتك بالضبط، وكمان هيساعدك فى أنك تزودى نسبة الدهون المفيدة فى جسمك Brown fat اللى بيزود من الطاقة  وتقللى من نسبة الدهون المضرة White fat

4- الشور البارد هيلمع شعرك:

لو بتعانى من الشعر الجاف و المتكسر، الحل مش فى البلسم وبس لكن كمان الشور البارد هيساعدك بشكل كبير، لما بنغسل الأطباق بمية سخنة بنلاحظ أنه ايدينا بقت مكرمشة وخشنة ، هو ده بالضبط اللى بتعمله المية السخنة لشعرك لانها بتسحب اى ترطيب من  فروة الرأس، علشان كده بننصحك أنك تحاولى تغسلى شعرك بمية باردة على قد ما تقدرى علشان تحمى بشرتك و شعرك من الخشونة والجفاف، مع الوقت هتلاحظى بلمعان أكتر فى شعرك و بشره أنعم  ولو عندك مشكلة مع حب الشاب ممكن تلاحظى تحسن فيها .

5-  تحسين المود:

ممن تفكرى أنه شور ساقع الصبح أول ما تقومى من النوم فكرة مش لطيفة، لكن الحقيقة أنه دى هى أفضل بداية ليومك لأنه الشور البارد بيحسن من المود وبيعزز النشاط بشكل كبير، لانه المية الباردة بتحفز المخ أنه يفرز مادة أسمها noradrenaline و المادة  دى هى المسؤولة عن تحسين المود ، لأنه أول ما المية الباردة بتلمس البشرة الأطراف العصبية بتحسها فوراً و بالتالى بتنبه المخ و الجسم كله فبتخليكى أنشط و فى مود أحسن

Facebook IconTwitter IconVisit Our InstagramVisit Our Instagram