23 وصية من أم لبنتها

30/07/2015

وصية

كتبت: هبة عشماوي

كل أم بتبقى عايزة بنتها أحسن بنت وتبقى أحسن منها كمان، أنا لما أخلف هعلم بنتي حاجات كتير أوي، أمي علمتهالي ولسه بتعلمهالي، في الأول بنفضل نقول “خلاص حفظنا النصايح والكلام ده يا ماما”، بس بيطلعوا صح في الآخر وكل اللي عايزينه بيبقى مجرد مصلحتنا.

هخلي بنتي تعرف الـ23 وصية اللي هيزيدوا مع الوقت واللي في أمهات كتير بيفضلوا يقولوا الكلام ده لبناتهم عشان يخلوهم أحسن ناس وعشان عندهم في الحياة اكتر بكتير مننا.

  • تحترم الناس.
  • تفضل على مبادئها مهما اتغيرت السنين والأجيال.
  • الحب مش عيب والعيب إنها تخبي.
  • تبقى مثال لأولادها ويبقوا فخورين بيها.
  • مافيش حد هيخاف عليها ويحبها قد مامتها وباباها.
  • الدنيا مش سهلة وهتشوف أيام وحشة زي ماهتشوف أيام حلوة.
  • لازم تبقى قد مسئولية الحاجة اللي قصداها.
  • تعمل اللي هي عايزاه مدام مش بتضر بحد ومش بتضر نفسها.
  • شغلها هو أقوى سلاح ليها وماتستغناش عنه تحت أي ظروف.
  • تقول كلمة “لأ” لما الموضوع يبقى محتاج إنها تقولها، لو حتى كلمة “نعم” أسهل وأريح.
  • تسافر وتتعرف على ناس جديدة وثقافات وعادات وتقاليد مختلفة.
  • تتأسف لما تغلط، لأن الأسف مش عيب.
  • ماتضيعش فلوسها على حاجات تافهة وتخلي الفلوس لحاجات تفيدها وتستمتع بيها في حاجات حلوة زي السفر مثلا.
  • العلم مش بيخلص، ماتوقفيش تعليم مهما كان سنك.
  • مافيش حاجة اسمها “عانس” دي كلمة مريضة مجتمعك بيقولها.
  • الجواز مش كل حاجة ولو مش عايزة تتجوزي وناجحة في حياتك وشغلك…ماتتجوزيش.
  • ماتخليش أي حد يكسر من طموحك وأحلامك.
  • عيشي كل لحظة في حياتك وافرحي.
  • ابسطي اللي حواليكي لو حتى بأبسط الحاجات.
  • اصبري، عشان زي مابيقولوا الصبر مفتاح الفرج.

Facebook IconTwitter IconVisit Our InstagramVisit Our Instagram