سحر النجاح

31/07/2015

سحر النجاح

كتبت: هبة عشماوي

طعم النجاح من أحلى الجمل اللي ممكن تسمع أي حد بيقولها، بيبقى في زي لامعة كده في العين لما الواحد بيبقى فرحان ومبسوط، والنجاح مش لازم يبقى في الشغل بس أو مذاكرة بس، ممكن نجاح في علاقتك بالناس، علاقتك بعيلتك، نجاح في حل المشاكل، نجاح في إنك تبسط حد لو حتى ماتعرفوش أو إنك تديله أمل في إنه يقدر يعمل حاجة…

طيب ليه طعم النجاح حلو؟ عشان بتحس بإحساس مختلف، إنتصار كده، بتعكس كلام ناس كتير عنك، بتحطم أي نظرة حد ليك كان محسسك بالفشل، طعم النجاح حلو عشان الواحد لما بينجح بيشوف الدنيا بشكل أحلى، بيبقى مستعد يساعد طوب الأرض ويحسسهم بنفس الفرحة اللي جواه، بتبقى فرحة ماتتوصفش، هتلاقي الشخص في كلامه بيبقى مختلف ويا سلام لما تبقى حاجة بيحبها وتعب فيها أوي وفي الآخر جابت نتيجة…إحساس مايتوصفش، فرحة وسعادة بيبقى مبالغ فيها كده بطريقة حلوة.

النجاح بيبقى زي جرعة كده بتجدد خلايا جسمك كلها، بتديلك القوة وبتقدر تستحمل حاجات كتير، يعني ببساطة النجاح ممكن يخلي الواحد يتغاضى عن مشاكل كتير في حياته لإنه بيبقى ناجح وقادر يبسط الكل فا في حاجات كتير مش بيركز فيها، بتبقى حاجة كده زي نظام “يا سيدي كبر دماغك”.

على فكرة زي ماقولنا النجاح مش لازم يبقى حاجة ليها علاقة بالإجتهاد والنجاح برضه أحيانا بيبقى “حظ”.

Facebook IconTwitter IconVisit Our InstagramVisit Our Instagram