الولادة القيصرية موضة؟

30/07/2015

pregnant-woman

مؤخرا الولادة القصيرية إنتشرت بشكل كبير وبقت غالبية الستات بيختاروها ويفضلوها عن الولادة الطبيعية، طبعا في حالات بتكون طارئة ومحتاجة القيصري علشان يقدروا يحافظوا على البيبي و الأم، بعيدا عن الطوارئ دي فيه التقليعات والموضة اللي ظهرت وخلت الستات كلها عايزة تولد قيصري علشان ألم الولادة اللي مش مضطرة تستحمله مادام البنج موجود، مش هو ده بس السبب كمان اغلبية الستات عايزة تحافظ على رشاقتها وخايفة على جسمها يبوظ من الولادة فبتختار تفتح بطنها، فيه برضو اللي عندهم هوس التواريخ فبيفضلوا يختاروا يوم الولادة كيوم مميز او مناسبة زي رأس السنة او عيد الحب، فيه بقى محبي الأبراج و المهتمين بإن البيبي يبقى برج الأسد مش برج العذراء.
ونلاقي الدكاترة بيشجعوا وبيرحبوا بالفكرة ما طبعا تكلفة الولادة الطبيعي تيجي إيه جنب القيصري، الأمهات بقى أكتر حد بيعارض الفكرة علشان خايفين على بناتهم و أحفادهم ويستمروا في مرحلة الإقناع اللي بتكون بجمل زي ” زمان كانت الواحدة تولد من هنا و تقوم تحضر العشا لجوزها ” ” عايزة تمشي ببطنك مفتوحة يا بنتي ” ” مالها الولادة الطبيعي ما أنا ولدتك إنتي و إخواتك و زي الفل أهو “. الزوج بقى وسط كل ده مايعملش حاجة غير إنه يسمع الكلام علشان يجيله إبنه بالسلامة.

Facebook IconTwitter IconVisit Our InstagramVisit Our Instagram