إزاي تعاقبي طفلك بدون ضرب؟!

17/11/2016

طفلك

الأطفال هم نعمة ربنا علينا وأكيد لازم نحافظ علي النعمة دي وكمان لازم نعلمه من صغره إنه يكون شجاع مش جبان أو خايف طول الوقت دا مش بس كدا لازم ابنك أو بنتك يكون مش مجرد أداه بتطلعي فيها غضبك بالعكس تكوني هادية معاه عشان يتعلم دا منك و يكبر يعامل الناس بطريقه كويسة مش يكون عنيف

عشان كدا فيه شوية طرق كدا لعقاب طفلك من غير ما تضربيه:

1-naughty corner  أو الوقت المستقطع:

أعتقد إن الموضوع دا بأه منتشر الفترة الأخيرة بس اللي مايعرفش naughty cornerدا بيكون عبارة عن كرسي بتحطيه بعيد عن منطقة لعب طفلك أو أي منطقة عموما بيحبها بتخليه يقعد علي الكرسي لوحده من غير ما تكلميه أو تنتبيهي ليه خالص لمدة دقيقه لكل سنه

يعني طفلك عنده سنه يبأه يقعد دقيقة،سنتين دقيقتين و هكذا.

2-صندوق المواسم:

الصندوق دا عبارة عن الصندوق اللي بتلمي فيها أى لعبه بيعاملها بعنف أو اتصرف فيها بشكل أزعجك أو مثلا رفض إن حد يشاركه لعبه بتشيلي لعبه دى و مش بيلعب بيها غير يوم واحد بس في الأسبوع و لازم يفهم السبب.

3-عوضني عن أخطائك:

أى غلط بيعمله زى مثلا إنه وقع طبق كوباية أو عضك ضربك لازم يعوضك عن غلطه بمعنى إنه ينضف مكان ما وقع الحاجة أو الأكل اللي وقعه،أو انه لو ضربك أو عضك يجيب فوطة بماية باردة و يحطها مكان ما ضربك بكدا طفلك هيتعلم إنه يكون شخص مسئول و مش عنيف بالعكس هيكون حنين

4-الإعتذار:

كلمة آسف بالنسبة للطفل مش بيفهمها أو يستوعبها ولا هيعرف هو بيقولها ليه لكن اعتذاره لازم يكون بطريقة تانية مثلا لو ضرب أخته أو اخوه  ف يحضن الشخص اللي غلط فيه أو يبوسه و ساعات ممكن تخليه يقول الحاجات اللي بيحبها في الشخص دا و طالما هو بيحبه ليه عمل كدا ؟!.

5-ماتكونيش انتي الحكم:

بمعنى لو كان أولادك في أوضة واحده أو مثلا مع قرايبه صحابه و حصلت خناقة بينهم علي لعبه أو حاجة بتدخليهم أوضة لوحدهم بحيث يحلوا مشاكلهم لوحدهم و ماتكونيش انتي الحكم أبدا أو تقولي انت اللي غلطان انت اللي تعتذر و هكذا هم يحلوا مشاكلهم بنفسهم و دا هيخليه كمان مسئول أكتر وانتي مش هتكوني مكروهه.

6-التجاهل:

دى بتكون مناسبة للأطفال الأشقيا و اللي عندهم نوبات غضب قوية دول بأه بتتعاملي معاهم بقاعدة التجاهل يعني الطفل اللي بيصرخ و يغضب عشان عاوز حاجة معينة تجاهليه و سبيه لوحده و ادخلي أوضتك لحد ما يخلص و خليكي حذرة في الموضوع دا بمعنى إنك ماتدمنيش موضوع التجاهل يعني لازم ترجعيله و تعرفيه هو غلط في ايه و انتي ليه سبتيه و مشيتي.

7-المدح:

المدح دا حاجة ضرورية جدا عشان الطفل لازم يفهم إن زى مافيه عقاب فيه مدح يعني تشكري فيه و في أسلوبه لكن بردو احذرى من ادمانه لأن ممكن ساعتها تخلقي منه طفل مدلل.

في حالة تانية من المدح بس مش لطفلك مثلا لو بيلعب مع صحابه أو اخواته بس هو بيرسم علي الحيطه أو بيعمل أى غلط لازم وقتها تمدحي في الشخص التاني اللي بيعمل الصح عشان يعرف الفرق بين الفعل الكويس قدامه مدح و العكس لكن ماتتماديش في مدح الطفل الآخر عشان دا ممكن يخلق غيرة جوه طفلك .

8-منح درجات للأطفال:

و دا بيكون عباره عن ورقة بتعلقيها من أول اليوم كدا كل فعل ليه كويس بتحطي زي استيكر كدا إنه عمل كام فعل صح علي مدار اليوم و دا بيشجعه إنه ياخد استيكرز أكتر و أكتر

خليكي متأكده ان تربية الأطفال مش سهلة على الإطلاق وإنها محتاجة صبر و نفس طويل و الأهم منهم إنك تحافظي علي علاقتك مع طفلك و تخليه دايما خايف علي زعلك مش خايف منك.

Facebook IconTwitter IconVisit Our InstagramVisit Our Instagram