اتجنبي مشاكل الكيكة بالحلول دي

28/12/2016

الكيكة

الكيك أسهل الحلويات اللي ممكن تعمليها لأولادك في اي وقت و أي ست بيت بتعرف تعملها بسهولة وده لإن مقاديرها متوافرة و موجودة في أي بيت و كمان سهلة مابتاخدش وقت، مشكلة الكيكة إنها مش دايما بتطلع مظبوطة أو ليها مشاكل كتير لكن كل مشكلة منهم ليها حلها فلازم تعرفي المشاكل إيه هي و ازاي تتجنبي الغلطات دي و هتحلي المشاكل دي ازاي:

  1. لو الكيكة بتطلع منك عالية من الجناب لكن هابطة من النص يبقى لازم ماتفتحيش الفرن عليها قبل 30 دقيقة.
  2. لو الكيكة بتكون ناشفة و هابطه معاكي يبقي ماتنسيش البكينج بودر قبل ما تخبزي الكيكة و لو بتحطي و برضو في نفس المشكلة غيري نوع البكينج بودر.
  3. لو الكيكة بتتحرق و بتسود منك في الفرن ممكن تحلي المشكلة دي عن طريق إنك تحمي الفرن قبل ما تحطي الكيكة فيه ولو حصل و اتحرق يبقى ممكن تقشري الحروق دي وتحطي عليها الكريمة.
  4. الكيكة لو بتلزق معاكي في الصنية و من الجناب يبقى لازم تبطني الصنية بالزبدة و ترشي فيها دقيق أو تحطي ورقة زبدة و بعدين تصبي الخليط.
  5. لو الكيكة بتفرفت منك و انت بتقطعيها يبقى ماتقطعهاش و هى سخنة استني عليها لما تبرد و بعدين قطعيها.
  6. الكيكة لو حجمها بيقل بعد لما تسويها يبقي حلها إنك تستخدمي سرعات ثابتة في الضرب بالمضرب ، و ماتضربيش المقادير أكتر من اللازم.

Facebook IconTwitter IconVisit Our InstagramVisit Our Instagram